“Balmain” eşikleri we aýakgaplary wirtual usulda geýip görmek mümkinçiligini döretdi
“Balmain” fransuz moda öýi eşiklerini we aýakgaplaryny wirtual usulda geýip görmek mümkinçiligini döretdi. Bu aýratynlyk emeli aňyň kömegi bilen döredilen 3D awatarlara ýöriteleşen “Bods” tehnologiýa firmasy bilen hyzmatdaşlykda işlenip düzüldi. Bu hyzmat markanyň resmi web-saýtynda elýeterli edildi.
Şeýlelikde, “Balmain”-iň müşderileri özleriniň wirtual nusgasyny döredip we oňa özleriniň isleýän eşikleriniň sanly nusgalaryny geýdirip görüp bilerler. Moda öýüniň wekilleri bu innowasiýa usuly yzyna gaýtarylýan harytlaryň möçberini azaldar we netijede, eltip bermek hyzmaty zerarly howada ýüze çykýan hapalanmalar öňküden kemeler diýip umyt edýärler.
“Brend has durnukly geljege tarap barýandygymyz üçin öňünde ýokary maksatlary goýdy. 'Bods' bilen hyzmatdaşlyk howadaky uglerod zyňyndylaryny azaltmak bilen bir hatarda, müşderiler üçin söwda hyzmatynyň tejribesini hem ýokarlandyrar” – diýlip, “Balmain” moda öýüniň baş direktory Žan-Žak Gewelýanyň bu hakyndaky ýüzlenmesinde aýdylýar.
