kino

Drakulamy ýa-da hudožnik — “Renfild” we “Reňk”

reňkli+

16 Apr 2023 — 3 min read

reňkli+ okyjylaryna mundan soň nesip edenden her hepde täze çykan filmleriň arasyndan käbiri ýa-da käbirileri bilen gysgaça tanyşdyrmagy makul bildik. Ilkinji hepdämizi hemmäniň sabyrsyzlyk bilen garaşýan azy ýaran kinolary bilen açmasagam, gürrüňini etjek kinolarymyz azyndan bir gezek tomaşa etmäge degýän ekran eserleri hasaplanýar. Gysgaça tanyşdyrjak filmlerimiziň käbirleri diňe kinoteatrlarda görkezilýän filmler, käbirleri-de “streaming” platformalarynyň önümleri, şol bir wagtyň özünde-de käbirleri ýurdumyzdaky kinoteatrlarda, esasan hem “Berkarar” kinoteatrynda görkezilýän kinolar bolar. Makalalarymyzda “spoiler”-iň berilmejekdigine-de sizi ynandyrmak isleýärin.

“Renfild”

Köpleriň söýgüli artisti, oskarly aktýor Nikolas Keýjiň wampiriň keşbinde surata düşen täze filmi “Renfild” (Renfield) diýlip atlandyrylýar. Filmde baş keşbi tanymal aktýor Nikolas Hult janlandyrýar. Filmde Brem Stokeriň nusgawy eseri Drakuladaky iňlis aklawçysy, Drakulanyň kömekçisi R. M. Renfild barada söhbet açylýar. Mälim bolşy ýaly, Renfeld “Drakula” eserinde diňe bir Drakulanyň kömekçisi däl, eýsem ol hyýaly zatlary görýändigi üçin dälihanada saklanýan biri hökmünde hem peýda bolýar. Kris MakKaýyň režissýorlyk eden filmi “supernatural”, komediýa, gorkuly (horror) görnüşli kino bolup, ol režissýoryň 4-nji ekran eseridir. Robot Chicken köp serialy animasiýalary bilen adygan režissýoryň mundan öňki 2 meşhur filmi “Lego Betmen filmi” (The Lego Batman Movie, 2017) animasiýasy bilen ylmy-fantastik görnüşli “Ertirki uruş” (The Tomorrow War, 2021) atly kinolardyr. Filmde başda-da belleýşimiz ýaly Kont Drakulanyň, ýagny Transilwaniýanyň meşhur wampiriniň keşbini Nikolas Keýj janlandyrýar. Onuň bu film üçin ýörite dişlerine-de timar berendigi (ýitiländigi) bellenilýär. Filmiň ssenarisini Robert Kirkmanyň Brem Stokeriň “Drakula” atly eserine salgylanyp ýazan hekaýalary esasynda Raýan Ridli taýýarlady. Filmdäki ýaňlanýan sazlaryň awtory-da Emmi baýragynyň eýesi, Oskaryň dalaşgäri, italiýaly tanymal kompozitor Marko Beltrami bolup, ol mundan ozal onlarça filmiň sazyny hem ýazypdy.

Filmde iki atdaş aktýor — Nikolas Hult bilen Nikolas Keýjden başga-da, soňky ýyllarda şöhraty artýan ýaş aktrisa Awkwafina, komediýaçy Ben Şwarts, Adrian Martines hem-de Hollywood-daky eýranly meşhur aktrisa Şohreh Agdaşlu dagy dürli keşpleri ýerine ýetirýär. “Skybound Entertainment” kompaniýasy tarapyndan surata düşürilen film “Universal Pictures” studiýasynyň garamagynda Demirgazyk Amerikanyň 3300 kinoteatrynda görkezilip başlandy. Film häzirlikçe tomaşa edenler tarapyndan ýokary ýa-da pes baha almady. Häzirlikçe filme tomaşa edenleriň 60 göteriminiň garaýşy pozitiw bolup, umuman alnanda, tomaşa etmezçe kino däl. Iki atdaş aktýoryň hatyrasyna tomaşa edilip bilner. Nýu Orleansda surata düşürilen film üçin 65 million dollarlyk çykdajy edildi. Filmiň şol çykdajysynyň öwezini dolmagyna garaşylýar.

Režissýor: Kris MakKaý

Ssenariçi: Raýan Ridli

Prodýuserleri: Robert Kirkman, Kris MakKaý, Dewid Alpert, Braýan Furst, Şon Furst

Esasy keşpler: Nikolas Hult, Awkwafina, Ben Şwarts, Adrian Martinez, Şohreh Agdaşlu, Nikolas Keýj

Kompozitory: Marko Beltrami

Öndüriji kompaniýa: “Skybound Entertainment”, “Giant Wildcat”

Paýlaýjy kompaniýa: “Universal Pictures”

Ekranlara çykan wagty: 14-nji aprel, 2023 (D. Amerika)

Görnüşi: “supernatural”, komediýa, gorkunç

Dowamlylygy: 93 minut

Ýurdy: ABŞ

Dili: iňlisçe

Býujeti: 65 million $

“Reňk”

Bu hepdeki 2-nji kinomyz aslynda 7-nji aprelde kinoteatrlara goýberilen ekran eseri bolup, ol “Reňk” (Paint) diýlip atlandyrylýar. Awtobiografiýa görnüşli film komediýa žanryna golaý bolan filmde baş keşbi komediýaçy Owen Wilson janlandyrýar. Owen Wilson Brit MakAdamsyň öz ssenarisi esasynda režissýorlyk eden filminde meşhur suratkeş, surat çekmegi ýeňilleşdiren, bütin dünýä söýdüren Bob Ross barada gürrüň berilýär. Irki ýyllarda dürli telewizýon kanallaryny açaňda, Bob Rossuň agajyň, dagyň, garaz tebigatyň peýzažyny çekip duranyna köp gabat gelinýärdi. Filmde hakyky ady Karl Nargl bolan şol meşhur, küdür saçly hudožnigiň durmuşy, ömür-döredijiligi barada söhbet açylýar. Karl Nargl teleýaýlymlaryň biri bilen şertnama baglaşýar we onuň şahsy durmuşy büsbütinleý üýtgeýär. Şondan soň ol Bob Ross adyny alýar.

1,5 sagatdan gowrak dowamlylygy bolan film ABŞ-nyň 800 töweregi kinoteatrynda görkezilýär. Bob Rossuň keşbini Owen Wilson, onuň söýgülisiniň keşbini-de Mikaela Watkins janlandyrýar. Filme tomaşa edenleriň ýaryndan azragy kinony halapdyr. Meşhur hudožnigiň durmuşy bilen tanyş bolmak isleýänler üçin iň bolmanda, birje gezek şans berilmeli kinomyka diýýärin.