“PepsiCo” daşky gurşawyň hapalanmagy sebäpli kazyýete berildi
Nýu-Ýork ştatynyň baş prokurory Letisiýa Jeýms Amerikanyň “PepsiCo” korporasiýasyny bir gezeklik plastik gaplar bilen daşky gurşawy hapalamakda aýyplaýar. Ol:
Nýu-Ýorklylaryň hemmesiniň arassa suwa hukugy bar, ýöne “PepsiCo” öz önümleriniň gaplaryna hem marketing amallaryna jogapkärçiliksiz çemeleşmek bilen, Baffalo derýasyna, daşky gurşawa we raýatlarymyzyň saglygyna howp salýar. Men adaty nýu-ýorklularyň hem-de planetamyzyň saglygyna we howpsuzlygyna howp salýan iri korporasiýalaryň garşysyna çykmakdan çekinmerin – diýip, aýgytly belleýär.
Düýbi Nýu-Ýork ştatynda ýerleşýän “PepsiCo” azyndan 85 sany marka içgileri we garbanyş önümleriniň 25 markasyny bir gezeklik plastik gaplara gaplaýar. Bu önümleriň gaplary ýurduň günbatar böleginde akýan derýanyň hapalanmagynyň esasy sebäbine öwrüldi. Ýörite geçirilen gözleg hem suw howdanynyň golaýynda tapylan hapalaryň 17% -den gowragynyň hut şu korporasiýa tarapyndan öndürilendigini ýüze çykardy.
Kazyýetiň beýanatynda bir gezek ulanylýan gaplaryň tiz dargap, daşky gurşawa howply mikroplastikalary goýberip başlaýandygy aýdylýar. Bu madda Eri kölünde we Buffalo derýasynda ýaşaýan balyklarda hem tapyldy. Balyklaryň bolsa ýerli ýaşaýjylar üçin iýmit çeşmesi bolup durýar.
