Pulumy howa gidereýin diýseň: «Coperni» howadan ýasalan sumka hödürleýär
Fransuz brendi «Coperni» 99%-i howadan, 1%- aýnadan ýasalan sumka hödürledi. Parižde geçen güýz-gyş ‒2024 moda hepdeliginiň çäginde ilkinji gezek köpçülige görkezilen bu sumka «Air Swipe Bag» diýlip atlandyrylýar.
«Coperni» bary-ýogy 33 gramdan ybarat bu täsin sumkany ýasamak üçin «Air Swipe Bag» Kipriň Amerikan uniwersitetiniň professory Ioannis Mihaludis bilen bilelikde işledi. Sumka üçin çig mal bolup, kremniýniň dioksidine esaslanýan aerogel hyzmat edýär. Şeýle nanomaterial ilkibaşda «NASA» tarapyndan aerokosmosda ýylylyk geçirmezlik we ýyldyzara tozanlary ýygnamak üçin ulanyldy. Aýtmaklaryna görä, bu aerogel ýer ýüzündäki iň ýeňil gaty maddadyr.
Göräýmäge, çalamydar ýaly görünse-de, bu sumka geň galdyryjy ýagdaýda berkdir. Öz agramy 33 gram bolan sumka özünden 6 esse agyr zady götermäge ukyply.
«Coperni» brendi öz Instagram sahypasynda «Air Swipe Bag-yň» suratyny goýup, oňa «99% hiç zatdan we 1% aýnadan ýasalan» diýip teswir goýanda ony görenleriň hersi bir zat diýdi. Kimler onuň berkdiginden şübhelenip, «derrew döwler» diýseler, kimler sumkanyň gurluşyndan kem gözlediler.
Ýöne her näme diýselerem, «Air Swipe Bag», görnüş üçin däl-de, hakykatdanam durmuşda ulanylmaga niýetlenen. Zenanlar bu sumkanyň içine Iphone, şeýle-de kosmetika hem salyp bilerler.
